Bergen internasjonale filmfestival får Christieprisen
Universitetet i Bergen har peika ut Bergen internasjonale filmfestival (BIFF) som vinnar av Christieprisen for i år.
BIFF får prisen for å skape arenaer som gjer forsking meir tilgjengeleg.
– BIFF legg til rette for eit unikt formidlingssamarbeid med Universitetet i Bergen. Festivalen har vist ei unik evne til å skape gode samarbeidsarenaer som bidreg til å gjere forskinga til universitetet tilgjengeleg for allmenta, seier juryleiar Pinar Heggernes i ei pressemelding.
Universitetet i Bergen deler ut Christieprisen årleg til ein person eller institusjon som har bidrege til god samhandling mellom forsking, utdanning og omverda.
Juryen trekkjer i grunngivinga for tildelinga fram den unike viljen festivalen har vist til å få til samarbeid som kjem den breie offentlegheita til gode.
– Vi er enormt takksame for anerkjenninga det er å bli tildelt Christieprisen. Den gir oss ekstra pågangsmot og oppmuntring til å halde fram arbeidet med å spreie kunnskap gjennom film, seier Kristian Fyllingsnes, festivalleiar i BIFF.
(©NPK)