Bild: Haaland-fristen går ut 30. april

Erling Braut Haaland har berre nokre dagar på seg før han må bestemme seg om kvar han held fram karrieren, melder avisa Bild.

stian.grythaugen@ntb.no/hege.grov@npk.no

Publisert: 20.04.2022 kl 10:21

– Han har ein klausul i kontrakten, og Haaland har ein frist ut april til å nytte seg av denne, sa avisa Bilds fotballredaktør Christian Falk til BBC tysdag.

Bild ligg svært tett på Borussia Dortmund og er ofte svært godt informert om kva som skjer i klubben.

Haaland fekk med i avtalen sin (går til etter sesongslutt i 2024) med Dortmund at han kunne forlate klubben i sommar for ein sum på cirka 750 millionar kroner. Det er omtrent halvparten av kva marknadsverdien hans blir vurdert til, mellom anna hos Transfermarkt.com.

Den britiske avisa Daily Mail melde måndag at Haaland har vorte samd med Manchester City om dei personlege vilkåra sine. Bild-redaktør Falk sa til BBC at også han er sikker på at Haaland hamnar i England frå sommaren av.

Real Madrid har vore nemnd som det andre moglege alternativet for den norske superspissen. Førstevalet til den spanske klubben er samtidig Paris-Saint Germains Kylian Mbappé, og det meste tyder på at han flyttar til Madrid til sommaren.

I tillegg skårar Karim Benzema som berre det fór Real Madrid om dagen.

(©NPK)

Erling Braut Haaland. Foto: Martin Meissner, AP / NTB