Trafikken flyt stort sett greitt: – Folk kjem seg heim til jul

– Folk kjem seg heim til jul, men kanskje litt seinare enn planlagt, seier pressevakt Øystein Løwer i Avinor til NTB fredag ettermiddag.

Lille julaftan starta med full stans i trafikken på Bodø lufthamn som følgje av kraftig vind og snøvêr. Men etter eit par timar kom trafikken i gang igjen.

– Dei har brøyta som berre det. Alle maskinene har vore ute, og dei prøver å få unna den trafikken som har vore forseinka. Dei er godt rusta til å ta imot ettermiddagsrushet, seier Løwer.

God flyt på dei største flyplassane

Flya som skulle teke av og landa i Bodø, vart forseinka, og desse forseinkingane har forplanta seg noko i resten av rutenettet.

– Men det har ikkje hatt så stor innverknad på dei største flyplassane i sør – Oslo, Bergen, Trondheim og Stavanger. Der går trafikken som normalt og det er fine forhold, seier pressevakta.

Folk kan sjekke sine eigne avgangar på nettsidene til flyselskapa og hos Avinor. Avinor har tidlegare anslått at det er venta 115.000 passasjerar på Gardermoen fredag.

Bergensbanen fekk problem

Fredag ettermiddag vart Bergensbanen stengd på grunn av eit arbeidstog som sperrar sporet. Elles flyt togtrafikken stort sett fint inn mot julehelga.

Pressevakt Britt-Johanne Wang i Bane Nor opplyser til NTB at det stort sett har vore lokale problem.

– Vi har nokre forseinkingar på Spikkestadbanen og straumtrøbbel på Gjøvikbanen, men utover det har juletrafikken gått bra så langt, seier ho.

Bane Nor oppmodar folk til å sjekke appane til togselskapa for å få informasjon om korleis dei handterer eventuelle forseinkingar.

Dårleg vêr i nord

Nord-Noreg er kanskje den delen av landet som har det heftigaste julevêret så langt. Trafikkoperatør Lars Nordås i Vegtrafikksentralen nord opplyser at det er mykje dårleg vêr i regionen.

– I Lofoten og Vesterålen er det mykje snø og sterk vind. Vi ser at enkelte av bruene blir av og til stengde på grunn av sterk vind, seier han til NTB.

Litt lenger sør, i Salten og Helgeland, er det mykje nedbør men ikkje så mykje vind, fortel Nordås.

– Det har vore kolonnekøyring over Saltfjellet, men er opna igjen no, seier han til NTB.

Trafikkoperatøren har dette rådet til folk som skal heim til jul i rufsevêret:

– Berekn litt betre tid og ta det med ro.

Helge-tendensar i Oslo

I hovudstaden merkar vegtrafikksentralen at det har byrja å tette seg på utfartsårene.

– Det ser eigentleg litt ut som ei vanleg utfartshelg frå Oslo-området, seier trafikkoperatør Christofa Key-Nilsen til NTB.

Ho seier at det er tett trafikk på E6 frå Alnabru og nesten opp til Kløfta. Også på E18 er det tett trafikk ut av Oslo sentrum og mot Asker.

– Mange reiste nok allereie i går, så dette er nok ein kombinasjon av folk som reiser heim frå jobb og folk som reiser på grunn av jula, seier Key-Nilsen.

Ein nisse ved køen framfor innsjekkingsautomatane på Oslo lufthamn Gardermoen torsdag ettermiddag, dagen før vesle julaftan.

Foto: Javad Parsa / NTB

Togtrafikken ser stort sett ut til å flyte greitt – bortsett frå ein stans på Bergensbanen. Foto: Ole Berg-Rusten / NTB

Det blir meldt om tett og saktegåande trafikk på nokre av utfartsårene frå Oslo. Illustrasjonsfoto: Ørn E. Borgen / NTB

Bodø lufthamn var stengd nokon timar fredag morgon og forseinkingane har forplanta seg noko i rutenettet. Foto: Heiko Junge / NTB