Bøndene overleverer krav til staten fredag
Jordbruksforhandlingane går i gang når bondeorganisasjonane fredag overleverer krava sine til staten.
Jordbruksoppgjeret er dei årlege forhandlingane mellom staten og jordbruksorganisasjonane Norsk Bondelag og Norsk Bonde- og Småbrukarlag.
Timeplanen for oppgjeret i år vart kjend tysdag, då Landbruks- og matdepartementet kunngjorde datoane.
Jordbruket legg fram kravet sitt 26. april, og staten skal svare med tilbodet sitt 6. mai. Partane har så frist til 16. mai med å komme i mål med forhandlingane.
Det er med eit bakteppe av stor brudulje at forhandlingane no går i gang. Bøndene protesterte utanfor Stortinget førre veke etter at regjeringspartia hadde vendt seg til Høgre og Venstre for å få fleirtal for landsbruksplanen.
Det enda med at det ikkje vart fleirtal i Stortinget for regjeringsplanen for å auke inntektene til bøndene, men landbruksminister Geir Pollestad (Sp) har likevel erklært at han vil leggje det til grunn i jordbruksoppgjeret.
(©NPK)
Bondeorganisasjonane legg fredag fram krava sine i jordbruksoppgjeret. Foto: Terje Bendiksby / NTB