Børsstup i Asia etter folkeavstemminga

(NPK-NTB-AFP-AP): Tokyobørsen stupte nesten 8 prosent etter at EU-motstandarane vann folkeavstemminga i Storbritannia. I Hongkong hadde den viktigaste indeksen falle 2,9 prosent då børsen stengde fredag ettermiddag lokal tid.

npk@npk.no

Publisert: 24.06.2016 kl 08:24

Sist oppdatert: 24.06.2016 kl 10:26

Store bevegelsar pregar finansmarknadane etter at resultatet av folkeavstemminga vart bekrefta.

Pundet stupte nesten 10 prosent på seks timar til den lågaste kursen på over 30 år. På morgonen norsk tid var oljeprisen 5 prosent lågare enn dagen før.

Då børsen stengde i Tokyo, hadde indeksen Nikkei 225 falle 7,92 prosent til 14.952,02 poeng. Nedgangen var den største sidan Japan vart ramma av den kraftige tsunamien i 2011. Samtidig fall den breiare japanske Topix-indeksen 7,26 prosent.

I Hongkong hadde Hang Seng-indeksen falle 2,92 prosent til 20.259,13 poeng då børsen stengde. Og i Shanghai var nedgangen på 1,3 prosent. (©NPK)