Brasil ber gravide turistar passe seg for mygg

(NPK-NTB-Reuters): Brasils helsedepartement ber gravide kvinner rådføre seg med lege før dei reiser til Brasil fordi dei kan bli smitta av Zika-feber viss dei får myggstikk.

npk@npk.no

Publisert: 18.01.2016 kl 15:43

Zika-viruset gir relativt milde symptom, men kan spreie seg til fosteret og i verste fall gi hjerneskade.

I helga åtvara amerikanske styresmakter gravide kvinner mot å reise til i alt 14 forskjellige land og område i Latin-Amerika på grunn av utbrot av Zika-feber. Det skjer etter at ein baby som var smitta av viruset, vart født med hjerneskade på Hawaii. Mor til barnet budde i Brasil i mai 2015, og fosteret vart mest truleg smitta under dette opphaldet.

Som følgje av dei amerikanske åtvaringane skjerper brasilianske styresmakter tiltaka mot sjukdommen. Blant anna vert turistar tilrådde å bruke myggspray og lange ermer.

Reiserådet frå USA gjeld for Brasil, Colombia, El Salvador, Fransk Guyana, Guatemala, Haiti, Honduras, Martinique, Mexico, Panama, Paraguay, Surinam, Venezuela og Puerto Rico. (©NPK)