Breivang og Erevik blir studioekspertar for TV 3 under handball-VM
Karoline Dyhre Breivang (39) og Ole Erevik (38) blir studioekspertar for TV 3 under handball-VM for kvinner i november og desember.
Det betyr at Frode Kyvåg (74) ikkje blir å finne på TV-sendingane frå meisterskapen i Japan, skriv VG.
Under EM i Frankrike var Kyvåg ekspert saman med Dyhre Breivang, medan Ervik var eksperten i kanalen under VM for herrar i januar.
- Eg har hatt fantastisk glede av å jobbe med den internasjonale handballen gjennom 35 år som TV-kommentator i så vel NRK som TV 2 og Viasat, seier Kyvåg til avisa.
Breivang har 305 landskampar for Noreg, medan Erevik har 184.
Redaksjonssjef Sjur Molven i Nent Group og Viasat seier Kyvåg er ein kapasitet dei framleis ønsker å bruke på andre handballprosjekt, som til dømes meisterligaen, men at dei valde å løyse VM med ei anna samansetning.
Alle av Noregs kampar blir viste på TV 3. Dei norske handballjentene innleier meisterskapen mot Cuba 30. november. Noreg møter òg Slovenia (02.12), Serbia (03.12), Angola (05.12) og Nederland (06.12) i dei innleiande VM-kampane i Kumamoto.
(©NPK)
Karoline Dyhre Breivang held fram som handballekspert, men Frode Kyvåg (midten) blir vraka til handball-VM for kvinner i november og desember. Til høgre står TV-kanalens Christian Ramberg. Foto: Vidar Ruud / NTB scanpix