Brør vann 700 kilometer langt sykkelritt i nord

– Det var utruleg hardt. Vi visste nok ikkje heilt kva vi gjekk til. Det gjekk utruleg fort i starten, og vi bestemte oss for å få ein hyggeleg tur, sa brørne Les og Paw Ager ved målstreken etter ekspedisjonsrittet på Finnmarksvidda.

Rittet blir rekna som eitt av dei tøffaste terrengsykkelritta i verda. Traseen gjekk i ei sløyfe frå Alta via Lakselv og Karasjok til Kautokeino, Masi og tilbake til Alta.

Ifølgje arrangørane har uvanleg store nedbørsmengder skapt vårflaum-tilstandar både i elvene og på traseane ryttarane køyrer på. Dei vanskelege forholda førte til at mange av deltakarane måtte gi seg undervegs.

– Det er ikkje normalt med så mykje nedbør på Finnmarksvidda som det har vore i sommar. OffroadFinnmark skal vere ei utfordring, men nedbøren har ført til at spora er blitt ekstra krevjande, seier rittleiar Jørund Greibrokk.

I år var det 315 deltakarar under rittet, som blei arrangert for 9. gong. Elleve nasjonalitetar var representerte under årets ritt, som gjekk frå 29. juli 6. august.

Det blir konkurrert i tre distansar: 150, 300 og 700 kilometer. Deltakarane syklar på to- og tremannslag. Kun 150 kilometer-klassen er soloritt. (©NPK)