Byavisa i Trondheim blir lagt ned

Nedlegginga skjer som følgje av langvarig driftsunderskot og betydeleg fall i annonseomsetninga i perioden 2013 til 2016, skriv Kampanje.

– Det er vemodig å måtte konstatere at marknaden ikkje lenger er berekraftig for ei gratisavis som Byavisa. Vi har gjort fleire grep dei siste åra for å tilpasse oss utviklinga i annonsemarknaden. Men vi har ikkje lykkast og må derfor ta konsekvensane av dette, seier styreleiar Henning Johansen i Norsk Avisdrift i ei pressemelding.

Styreleiar Arild Engebretsen i Nr1 Adressa-Trykk Orkanger AS seier at eigarane over tid har tilført avisa kapital for å sikre utgjevinga.

– Basert på den utviklinga vi no er vitne til, har vi vurdert situasjonen på nytt og kome til at grunnlaget for å tilføre selskapet ytterlegare kapital for å dekke nye underskot, ikkje lenger er til stades. Den negative trenden forsterkar seg, og vi trur ikkje det er ei realistisk moglegheit til å bringe drifta i balanse, seier Engebretsen.

Norsk Avisdrift AS, som gir ut Byavisa, er eigd av Nr1 Adressa-Trykk Orkanger AS. Dette selskapet er igjen eigd av Amedia og Polaris Media.

Byavisa har sju tilsette, som fredag blei informerte om avgjerda om å avvikle verksemda. Siste nummer av gratisavisa vil bli gitt ut onsdag 25. mai. (©NPK)