Bygging av LNG-terminalar i Tyskland startar denne veka
Denne veka startar Tyskland bygginga av ein ny importterminal for flytande naturgass (LNG), som eit tiltak for gjere landa mindre avhengig av russisk energi.
Tysdag startar det tyske selskapet Deutsche Regas arbeidet med å byggje ein importterminal i den nordaustlege byen Lubmin.
Lubmin er ein av fleire kystbyar som no skal ta imot LNG som ei erstatning for russisk gass, som Tyskland tidlegare har fått gjennom gassrøyrleidningen Nord Stream 1.
Byggjearbeidet har som mål å utvide dagens hamn i byen slik at han kan ta imot dei store skipa som fraktar naturgassen.
Bakteppet for at Tyskland no byggjer ny infrastruktur for energi er krigen i Ukraina, og dessutan at Russland har stansa eller redusert gassleveransane til fleire europeiske land.
Russlands handlingar har ført til skyhøge prisar på energi, både i Tyskland og i resten av Europa.
(©NPK)