Chaffey vil inn på Stortinget

51-åringen frå Bærum var i tolv år administrerande direktør i foreininga til NHO for kunnskaps- og teknologibedrifter, Abelia, og er i dag statssekretær i Kommunal- og moderniseringsdepartementet.

Også sjefen til Chaffey, kommunal- og moderniseringsminister Jan Tore Sanner, står på lista over stortingskandidatane til Akershus Høgre. Det same gjer dottera til Sanner, 23 år gamle Maria Barstad Sanner, skriv Budstikka.

Andre personar frå Asker og Bærum som står på lista, er Henrik Asheim (33), Hårek Elvenes (57) og Bente Stein Mathisen (60). Alle sit i dag på stortingsbenken for Akershus for regjeringspartiet Høgre, og alle desse tek attval.

Dersom Chaffey blir vald inn på Stortinget neste år, er det 20 år sidan han avslutta to periodar på tinget for SV. Han var leiar av Sosialistisk Ungdom frå 1988 til 1990 og melde seg ut av SV i 1997.

Nominasjonskomiteen til Akershus Høgre la torsdag fram namnelista over aktuelle kandidatar til stortingsvalet i 2017. Komiteen legg fram innstillinga si 20. oktober.

– Vi er svært glade for at det er så mange flinke og engasjerte kandidatar som har stilt seg til disposisjon for Akershus Høgre. Det finst mykje bra politisk erfaring blant kandidatane, og det er ei god blanding med tanke på kjønn, alder, yrkesbakgrunn og distriktstilhøyrsel, seier leiar for nominasjonskomiteen Ketil Nordengen i ei (©NPK) pressemelding.