Charlie Hebdo har væpna Gud på framsida

(NPK-NTB-Reuters-AFP): Ei teikning av Gud med blod på hendene og ei automatrifle over skuldra pregar framsida av Charlie Hebdo eitt år etter at bladet blei ramma av eit terrorangrep.

npk@npk.no

Publisert: 04.01.2016 kl 14:38

Saman med teikninga står teksten «Eitt år seinare: Mordaren er framleis på frifot».

Dermed er det franske satirebladet enda ein gong nærast garantert å få reaksjonar både frå konservative muslimar og kristne. Den nye utgåva kjem ut onsdag i samband med eittårsdagen for terrorangrepet.

Åtte av dei tilsette i magasinet og fire andre personar blei drepne då to ytterleggåande islamistar angreip redaksjonslokala 7. januar i fjor. Til saman fem menneske blei drepne av ein annan muslimsk ekstremist dei neste dagane.

Omfattande tryggingstiltak blir sett i verk når eittårsdagen blir markert med fleire seremoniar i Frankrike denne veka. (©NPK)