CIA: Mateen hadde ingen band til terrorgrupper

(NPK-NTB-AP): CIA har ikkje funne noko hopehav mellom Orlando-drapsmannen og utanlandske terrororganisasjonar, opplyser direktør John Brennan.

Omar Mateen skaut og drap minst 49 menneske og såra over 50 andre da han sist helg gjekk til angrep på nattklubben Pulse, ein utestad for homofile og andre LHBT-personar.

CIA-direktøren sa i ei høyring i etterretningskomiteen i det amerikanske Senatet torsdag at ekstremistgruppa IS kjem til å halde fram med å inspirere til såkalla einsam-ulv-angrep.

Amerikanaren Mateen, som hadde afghanske røter, erklærte truskap til IS under ein samtale med nødsentralen under massakren. Men han snakka òg varmt om Syria-fløya til al-Qaida, som kjempar mot IS i Syria.

Brennan seier han har sett i Orlando, San Bernardino og andre stader at IS prøver å inspirere tilhengarar til å utføre angrep utan at gjerningspersonane har noka direkte tilknyting til IS.

CIA deler etterretningsinformasjon med FBI for å prøve å identifisere moglege einslege angriparar, men CIAs ansvar er å samle informasjon om operasjonar utanfor USA, poengterer Brennan. (©NPK)