Den norske regjeringa forhandlar tvangsreturavtale med Somalia

(NPK-NTB): Den norske regjeringa er i ferd med å sluttføre ein returavtale med Somalia, etter det NRK erfarer. Avtalen vil opne for tvangsutsending av om lag 500 somaliarar.

npk@npk.no

Publisert: 27.05.2016 kl 16:32

Fredag har det vore fleire politiske møter med ein delegasjon med ministrar frå Somalia. Dei har blant anna diskutert migrasjon og retur med den norske regjeringa, opplyser departementet i ein e-post til NRK.

Utanriksminister Børge Brende (H) møtte den somaliske utanriksministeren Abdusalam Omer under det nordisk-afrikanske utanriksmøtet fredag.

Leiar i Somalisk nettverk Bashe Musse, som òg er bystyrerepresentant i Arbeidarpartiet i Oslo kommune, seier til kanalen at han er sjokkert.

– Særleg i den sørlege delen av Somalia er det ikkje trygt. Vi veit at i nokre fylke er 60– 70 prosent kontrollert av terrorgruppa Al Shabaab. Difor snakkar vi om at tryggleiken for den enkelte blir avgjort når ein skal returnere til Somalia, meiner Musse.

I 2015 søkte 561 personar frå Somalia om asyl i Noreg, ifølgje UDI. Hittil i år har det komme 78 asylsøkjarar frå landet. (©NPK)