Det kan bli søppel-streik til helga

Det er medlemmer i Sarpsborg, Bergen, Stord, Godvik, Stavanger og Stokke som først blir tatt ut i streik.

«Ein streik vil påverke innhenting og levering av hushaldningsavfall i enkelte delar av landet. Streiken vil også påverke henting og levering av avfall frå bygg og anleggsnæringa», melder Norsk Transportarbeiderforbund.

Transportarbeiderforbundet har varsla at dei vil ta ut 50 medlemmer i streik om partane ikkje blir samde i meklinga som startar fredag. Fristen for å bli samde er sett til klokka 24 laurdag.

– Norsk Transportarbeiderforbund er innstilt på å finne ei løysing, men vi er også innstilt på streik om meklinga ikkje gir eit resultat som bransjerådet for Miljø kan akseptere, seier forhandlingsleiar Ole Einar Adamsrød i Transportarbeiderforbundet.

I dei ordinære forhandlingane mellom Transportarbeiderforbundet og NHO Transport var auke av minstelønna eit sentralt punkt som førte til at forhandlingane braut saman tidlegare i sommar.

– Minstelønna er eit viktig verktøy for å unngå sosial dumping i bransjen og for å styrke det generelle lønnsnivået til dei tilsette, seier Adamsrød. (©NPK)