DN-eigar forlèt amerikansk skatteparadis
NHST, som eig Dagens Næringsliv, har tre internasjonale bransjeaviser registrert i den amerikanske delstaten Delaware. No vil dei sjå på ei ny organisering.
– NHST er oppteke av transparents, og derfor har vi byrja å sjå på det på nytt, seier direktør Trond Sundnes i NHST Global Publications til Medier24.
Det er dei engelskspråklege bransjeavisene TradeWinds, Upstream og Intrafish som er registrerte i delstaten. Dette vart først kjent i eit lesarinnlegg i DN frå Equinors pressetalsmann Bård Glad Pedersen.
– For ei mediebedrift der journalistane av prinsipp kjempar for openheit, ser det uklokt ut at moderselskapet har selskap i jurisdiksjonar utan innsyn, seier klubbleiar Ida Grieg Riisnæs i Dagens Næringsliv.
Delaware er kjent som eit skatteparadis for amerikansk næringsliv. Delstaten har ei befolkning på drygt 970.000, men meir enn éin million bedrifter er registrerte i delstaten, mellom dei meir enn to tredelar av selskapa på Fortune 500-lista, skriv delstatsstyresmaktene.
(©NPK)