DPA: Landskamp i Tyskland avlyst etter truslar

Tysklands statsminister Angela Merkel og fleire andre regjeringsmedlemmer skulle etter planen vera til stades under vennskapskampen i Hannover.

Det tyske nyheitsbyrået DPA har fått vita at fotballkampen blei avlyst på grunn av informasjon som kunne tyda på arrangementet var truga av eit angrep.

Publikum som allereie var på stadion i Hannover, fekk beskjed over høgtalaranlegget om at fotballkampen som skulle starta klokka 20.45, er avlyst. Politiet opplyser at årsaka er tryggingsomsyn.

– Det er ingen fare på ferde eller noko anna. Berre reis heim på normalt vis, sa politiet i høgtalaren halvannan time før kampen skulle starta.

Det tyske fotballandslaget var på det tidspunktet enno ikkje komne til stadion.

Fotballsupporterane fekk beskjed av politiet om å koma seg ut av stadion raskt og utan panikk, skriv Die Welt.

Tysklands fotballandslag spelte mot Frankrike i Paris sist fredag, då fleire sjølvmordsbombarar slo til utanfor stadion i den franske hovudstaden. 129 menneske blei drepne i ei rekkje terrorangrep i Paris.

Først søndag blei det vedteke at fotballkampen i Hannover tysdag skulle gå av stabelen, som ei markering av at dei ikkje ville føya seg for terrorismen. (©NPK)