Duterte gir EU fingeren

– Eg seier «fuck you» til dei, dei skal få sone for syndene sine, tora den 71 år gamle presidenten og viste fingeren under eit intervju med fjernsynsstasjonen ABS-CBN.

Utfallet kom som ein reaksjon på at EU-parlamentet fordømte «den noverande bølgja av utanomrettslege avrettingar på Filippinane».

Duterte lovde i valkampen å drepe 100.000 kriminelle, og over 3.000 påståtte kriminelle er drepne sidan han overtok som president i juni.

Duterte har hausta skarp internasjonal kritikk, mellom anna frå FN og USA, som klagar han for å oppmuntre til utanomrettslege avrettingar.

Den filippinske presidenten har slått hardt tilbake og kalla FNs generalsekretær Ban Ki-moon for «ein tosk» og USAs president Barack Obama for «ein horeson».

Pave Frans er også utrop til «horeson» av Duterte, og det same er USAs ambassadør i landet som han også har omtalt som «homo-ambassadør». (©NPK)