Duterte oppfordrar til drap på narkomane

(NPK-NTB-AFP-AP): Filippinanes nye president Rodrigo Duterte oppfordrar vanlege folk til å drepe narkomane og kommunistgeriljaen til å drepe narkotikasmuglarar.

Duterte vart tatt i eid som president torsdag etter ein overveldande valsiger i vår. Etter ein relativt moderat innsettingstale tok han bladet frå munnen då han om kvelden besøkte eit fattig slumområde i Manila.

– Desse horesønene øydelegg barna våre. Dersom de kjenner til narkomane, køyr i veg, drep dei sjølve, sa han og åtvara også politimenn mot å vere med på narkosmugling, for då ville han «verkeleg drepe dei».

Fredag fortsette han på same tema då han oppfordra kommunistgeriljaen til å halde eigne rettssaker mot narkotikasmuglarar og deretter «avrette» dei.

– Narkotikaen har nådd fram til baklandet. Kva om de brukar dei såkalla rettsmøta dykkar til å få fart på løysinga av vårt problem, sa han til geriljaen som har kjempa ein væpna kamp i fleire tiår.

Geriljaen NPA er kjent for å ha drepe sivile dei seier har gjort seg skuldige i «brotsverk mot folket».

Duterte lovde i valkampen å løyse heile fattigdomsproblemet på Filippinane på seks månader ved å drepe titusenvis av kriminelle.

Løfta hans blir ikkje tatt som ein spøk. Han blir skulda for å ha stått bak dødsskvadronar som har tatt livet av tusenvis av kriminelle i dei åra han var guvernør i Davao sør i landet. (©NPK)

Annonse