Dystre dødstal i vegtrafikken

I juni omkom 15 personar (mot ni året før) og 22 personar i juli (mot 15 i 2015). I august har hittil 11 personar mista livet, noko som er tre færre enn same månad i fjor.

– Vi har inga enkel forklaring på utviklinga. Sjølv om tala er ein del høgare enn dei rekordlåge tala på omkomne frå i fjor, er det likevel lågare enn andre føregåande år, seier Guro Ranes i Statens vegvesen i ei pressemelding.

Den førebelse analysen av sommarulukkene viser at menn står for heile auka i talet på omkomne, spesielt dei som er over 45 år. Medan det omkom seks færre kvinner i juni, juli og august enn i fjor, var det 16 fleire menn som omkom.

Rogaland har vore hardast råka i sommar, med sju drepne, medan Vestfold og Nord-Trøndelag er dei einaste fylka som har komme seg gjennom sommaren 2016 utan ei einaste dødsulukke i trafikken.

Gjennom dei åtte første månadane har 95 personar omkomme i trafikken. Dette er 28 fleire enn i 2015, men likevel lågare enn åra før. I 2015 omkom 117 personar på norske vegar, som er det lågaste talet sidan 1947. (©NPK)