Alle evakuerte etter jordras i Malvik får flytte heim

Geologar har friskmeldt rasområdet, opplyste politiet i Trøndelag like etter klokka 16, vel tre timar etter at det gjekk eit ras som stengde E6.

Ein bil vart teken av raset, og sjåføren, som var åleine i bilen, er send til sjukehus. Nødetatane fekk melding om raset klokka 13.06, og sjåføren vart først grave ut etter nesten halvannan time under rasmassane.

God form

Kommunikasjonsrådgivar Sondre Lyngholm i Acciona stadfestar overfor Adresseavisen at mannen som hamna i skredet, er tilsett hos ein underentreprenør som arbeidde på staden.

– Forma til mannen ser ut til å vere god, ut frå det han har vore utsett for, seier Lyngholm, som fortel at mannen var medviten og gjekk på eigne bein etter at han vart henta ut av skredet.

Politiet opplyser at dei ikkje har grunn til å tru at fleire vart tekne av skredet.

E6 stengt

Stavsjøtunnelen, der raset gjekk, ligg midt mellom Trondheim og Stjørdal. E6 blir stengd ei god stund framover, og det er omkøyring via fylkesveg 950.

– Det er ein god del massar som har rasa ut. Det er stein, grus, gjørme og nokre trestokkar. Det vil ta dagar å få opna igjen. Autovern og andre installasjonar er knuste, seier trafikkoperatør Frank Nilsen i Vegtrafikksentralen til VG.

Vegtrafikksentralen opplyser onsdag kveld til NTB at vegen heilt sikkert ikkje blir opna onsdag.

(©NPK)

Ein bil vart teken av eit jord- og steinras på nordsida av Stavsjøtunnelen langs E6 i Malvik onsdag. Foto: Joakim Halvorsen / NTB / NPK