Ein milliard til havbasert forsking

Både statsminister Erna Solberg, næringsminister Monica Mæland (H) og fiskeriminister Per Sandberg (Frp) møter toppleiarane i næringslivet, akademia og organisasjonar for å diskutere meir samhandling mellom havbaserte næringar som fiskeri, oppdrett, petroleumsindustri og skipsfart.

Regjeringa har tidlegare varsla at dei vil legge fram ein ny havstrategi våren 2017.

Til saman er 1 milliard kroner øyremerkt i år gjennom programma til forskingsrådet for marine og maritime næringar og olje og gass.

– Havnæringa har eit stort potensial. Med denne satsinga på forsking legg vi til rette for å utvikle nye arbeidsplassar, seier næringsminister Monica Mæland (H) i ei pressemelding.

– Dette er ikkje ei prioritering av havet, snarare tvert imot. Pengane skal også gå til forsking på olje og gass, næringar som skadar klimaet og set havmiljøet i fare. Å seie at ein satsar på havet er ei dryg tåkelegging, seier Anna Olerud, sentralstyremedlem i Natur og Ungdom.

– Noreg har verdsleiande selskap, vi har leiande forskingsmiljø og vi har store havområde med rike biologiske ressursar. Noreg har dei beste føresetnader for å legge til rette for vekst i havnæringane, seier fiskeriminister Per Sandberg (Frp). (©NPK)