Elev tatt på skule i Asker etter truslar via Jodel

Politiet fekk meldinga om at det skulle liggje ein trusselvideo på YouTube/Jodel, klokka 12.17 fredag, opplyser Oslo politidistrikt i ei pressemelding fredag ettermiddag.

– Væpna politi rykte umiddelbart ut til skolen og fekk kontroll over situasjonen og eleven, som vi reknar med har sett fram truslane. Beredskapstroppen og forhandlartenesta var med på oppdraget, skriv kommunikasjonsrådgivar Torill Frogner i Oslo politidistrikt.

Politiet ønskjer ikkje å gå ut med detaljar om innhaldet i truslane eller eleven som vart tatt. Ingen kom til skade i det som skjedde.

Ifølgje Budstikka vart det lese opp ei melding på høgtalaranlegget på skulen, der elevar og lærarar fekk beskjed om å ikkje forlate lokala før politiet gav klarsignal.

Overfor VG ønskjer ikkje politiet å kommentere om det var våpen involvert i saka.

Det har tidlegare komme truslar mot andre skular via den tyske mobilappen Jodel. I starten av februar kunngjorde Kripos at dei har bedt grunnleggjarane av meldingstenesta om eit tettare samarbeid for å identifisere dei som står bak truslane. (©NPK)