Elevar tok bilete med drapsmannen i Trollhättan
(NPK-NTB): Tre elevar som trudde gjerningsmannen spøkte då han stilte opp på skulen med sverd og maske, tok eit bilete saman med han like før han angreip Kronan skole.
Ei skulejente skulle ut på gangen for å hente ein penn då ho trefte gjerningsmannen saman med to av vennene hennar.
– Han spelte rar musikk og sa ikkje eit ord. Det var halloween-aktig musikk, seier jenta til Aftonbladet.
Ho tok eit bilete av mannen saman med dei to kameratane. Biletet viser at han bar på ein lang gjenstand, at han var maskert og hadde på seg ein svart hjelm. Mannen på biletet er kvit i huda.
Ein lærar som kom forbi, bad mannen om å forlate skulen.
– Han berre nikka, og så sette han kniven i den høgre sida til læraren. Det siste eg høyrde han seie var «ring ambulansen», seier Sara, som sprang frå staden saman med dei to vennene sine.
– Eg var kjemperedd. Eg har så vondt i magen, dette er frykteleg, seier jenta. (©NPK)