Elleve døde etter togkollisjon i Tyskland

Ein mann som vart alvorleg skadd i ulykka, døydde på sjukehuset, opplyser politiet torsdag.

Ulykka skjedde ved byen Bad Aibling på ein lokal eittsporstrekning rundt seks mil søraust for München like før klokka 7 tysdag morgon.

Etterforskarane er i gang med å leite etter årsaka til ulykka.

Informasjonen i ein av tre svarte boksar frå dei to toga som kolliderte, gir ingen indikasjonar på at teknisk svikt var årsaka til ulykka, opplyste Tysklands transportminister onsdag.

I tillegg til dei elleve omkomne, vart 17 menneske alvorleg skadde, mens 63 andre fekk lettare skadar i den kraftige frontkollisjonen. (©NPK)