Erdogan: Russland medansvarleg for 400.000 drepne i Syria

(NPK-NTB-Reuters): Den tyrkiske presidenten seier Russland og det syriske Assad-regimet må haldast ansvarlege for drap på 400.000 menneske i Syria.

– Russland er involvert i ein invasjon i Syria, sa den tyrkiske presidenten Recep Tayyip Erdogan på ein pressekonferanse i Istanbul fredag.

– Russland må haldast ansvarleg for menneska dei har drepe innanfor dei syriske grensene, der talet drepne menneske no har passert 400.000, sa han vidare.

Borgarkrigen i Syria starta i mars 2011 og har dermed snart gått føre seg i fem år. Ifølgje tal frå FN, frå august 2015, er 250.000 menneske drepne i krigen, medan berekningar frå eksilgruppa Syrian Observatory for Human Rights (SOHR) frå oktober, viser eit dødstal på opp mot 340.000. (©NPK)