EU nærmar seg nye våpenreglar

(NPK-NTB): EU-landa har blitt samde om skjerpa våpenreglar dei håpar skal hjelpa i kampen mot terrorisme.

Publisert: 10.06.2016 kl 15:33

Jegerar og sportsskyttarar i Noreg, Sverige og Finland har vore svært skeptiske til det nye våpendirektivet i EU. Men den svenske innanriksministeren Anders Ygeman er ifølgje TT nøgd med kompromisset EU-landa blei samde om på fredag.

Saka er likevel ikkje ferdigbehandla i EU. No skal vedtaket til medlemslanda til forhandling med EU-parlamentet.

Direktivet inneber eit forbod mot at privatpersonar kan eiga heilautomatiske våpen, i tillegg til visse halvautomatiske våpen med store magasin, ifølgje TT, men med unntak for organisasjonar knytt til forsvaret. Vidare tek ein sikte på å stramma inn reglane for å skaffa seg dei farlegaste skytevåpena, innføra strengare reglar for våpensal på nett og skjerpa innsatsen mot våpensmugling gjennom betre sporing av våpen.