Fakta om lekkasjar frå statsbudsjettet for 2023

• Regjeringa foreslår å innføre grunnrenteskatt for havbruksnæringa og auke grunnrenteskatten og dessutan innføre ei høgprisavgift for kraftprodusentar. I alt vil dette auke skatteinntektene med 33 milliardar kroner årleg.
• Regjeringa innfører ein sekspunktsplan for straumsparing. På lista er mellom anna 1,1 milliardar kroner til Enova som skal brukast til straumsparing i norske heimar, skriv NRK.
• Formuesskatten blir auka, opplyser kjelder til Dagbladet. I tillegg kan det bli snakk om å auke satsen for formuesskatt. I fjor vart satsen auka med 1,35 prosent for dei med formuar over 20 millionar kroner etter forhandlingar med SV om statsbudsjettet.
• Ifølgje Dagbladet vil det komme endringar i inntektsskatten. Regjeringa har vore tydeleg på at skatten skal ned for personar med «vanlege inntekter» på inntil 750.000 kroner, men dei som tener meir, kan få auka skatt.
• Fleire vegprosjekt kan bli skove på, blant dei E134 Oslofjordforbindelsen, E134 Røldal-Seljestad i Vestland, E6 Megården-Mørsvikbotn i Nordland og E16 Hylland-Slæen i Vestland. Påbyrja prosjekt vil ikkje bli utsett eller kutta, blant dei den omstridde utbygginga av E18 vestover (Vestkorridoren).
• Ifølgje NRK legg regjeringa opp til at utanlandsstudentar frå no av må betale for utdanninga i Noreg. Ifølgje tidlegare anslag kostar utanlandsstudentane om lag 3,5 milliardar kroner i året.
• Folkehelseinstituttet (FHI) kan vente seg eit kraftig kutt, ifølgje Aftenposten. Det kjem på toppen av eit solid kutt tidlegare i år. Det er anslått at nærare 250 stillingar kan forsvinne.
• Ifølgje Vårt Land vil målet om å gi 1 prosent av nasjonalinntekta i bistand truleg ryke i statsbudsjettet for 2023 på grunn av store olje- og gassinntekter. I 2016 bestemde eit fleirtal på Stortinget at 1 prosent av BNI skal avsetjast til bistand i dei årlege budsjetta.
• Kulturminister Anette Trettebergstuen (Ap) har varsla at mange av dei konkrete løfta i Hurdalsplattforma på kulturfeltet blir sett på vent. I 2022 gjekk cirka 0,9 prosent av statsbudsjettet til kultur. Andelen vil ikkje bli høgare i 2023. Støtta til skeive organisasjonar blir likevel foreslått auka med 15 millionar kroner, nær ei dobling frå 2022, skriv NRK.
• Regjeringa har lova å auke frådraget for fagforeiningskontingent i budsjettet for 2023, skriv Altinget. I fjorårsbudsjettet vart maksimalt frådrag for fagforeiningskontingent auka med 50 prosent.
• Ifølgje VG har regjeringa har sett av 96 millionar kroner ekstra til sportsutstyr og fritidsaktivitetar for barn og unge.
• NRK melder at regjeringa vil gi fastlegar ekstra tilskot for eldre og sjuke pasientar som eit ledd i å løyse fastlegekrisa.

(©NPK)