Fare for fransk streikekaos under EM

Det er steile frontar i fransk arbeidsliv mellom fagforeiningane og regjeringa etter at sistnemnde prøver å få gjennom ei arbeidsreform som blant anna svekkjer oppseiingsvernet og opnar for meir fleksible arbeidstidsreglar. Tusenvis har protestert i gatene den siste veka.

Det er ikkje mange dagar til fotballturistane begynner å ta over dei ulike EM-byane i landet. 10. juni startar meisterskapen. Konflikten må derfor løysast raskt om den ikkje skal gå utover EM.

Tysdag blir togtrafikken ramma av streik, og frå torsdag vil metro og bussar i Paris bli kraftig redusert. Flytrafikken blir involvert frå fredag.

– Eg kjem til å fortsette, for eg meiner dette er gode reformer, har president François Hollande uttalt.

– Det kjem ikkje til å bli tog- eller metrostreikar under fotball-EM, insisterer sosialistpartiets generalsekretær Jean-Christophe Cambadelis.

Frankrike møter Romania i opningskampen 10. juni. (©NPK)