Færre brev og lågare inntekter for Posten

Det såkalla adresserte brevvolumet fall med heile 14 prosent i årets tre første månader, opplyser konsernet i ei pressemelding. Spesielt dei største kundane i bank og finans har redusert talet på brevsendingar kraftig. I første kvartal var nedgangen på 25 prosent samanlikna med same periode i fjor.

Totalt var resultat før nedskrivingar og eingongseffektar innan postsegmentet 176 millionar kroner i første kvartal, heile 149 millionar mindre enn i det same kvartalet i fjor.

– Resultatet understrekar viktigheita av både gjennomførte og planlagte tiltak. Regjeringas framlegg om å slå saman A- og B-post er eit viktig og nødvendig neste skritt for å tilpasse servicetilbodet til kundanes endra bruk av Postens tenester, seier avtroppande konsernsjef Dag Mejdell.

Stortinget vil truleg behandle dette forslaget alt før sommaren. Endringane vil da kunne gjennomførast i 2017.

Både stabs- og støttefunksjonar i Posten er kutta i første kvartal. Dessutan er postleveringen på laurdagar avvikla, medan det er gjort endringar i landposttenesta. Posten skriv at det blir gjennomført «bemanningstilpassingar» heile tida. (©NPK)