FBI-agent fekk sparken etter Trump-kritikk
FBI-agenten Peter Strzok, som i fjor blei fjerna frå Russland-granskinga på grunn av tekstmeldingar med kritikk av president Donald Trump, har fått sparken.
Spesialetterforskar Robert Mueller fjerna Strzok frå teamet sitt for eitt år sidan då tekstmeldingane blei avslørt. Måndag opplyser Strzoks advokat at den mangeårige agenten fekk sparken sist fredag av FBIs visedirektør David Bowdich.
Strzoks advokat Aitan Goelman kritiserer oppseiinga, som han meiner er eit resultat av politisk press. Han skuldar også FBI for «å straffa spesialagent Strzok for politiske utsegner som er verna av det første grunnlovstillegget», med tilvising til ytringsfridomen.
Alle amerikanarar bør vera djupt uroa over oppseiinga, legg advokaten til.
Trump har gong på gong kritisert Strzok på Twitter. FBI hadde måndag ingen omgåande kommentar til saka.
48 år gamle Strzok sende under valkampen i 2016 tekstmeldingar til ein venn og tidlegare FBI-advokat som inneheldt kritikk av dåverande presidentkandidat Trump. Trump har mellom anna vist til desse tekstmeldingane når han har hevda at granskinga til Mueller av russisk innblanding i valkampen er ei politisk heksejakt.
(©NPK)