Fem presidentar til stades under minnegudstenesta til Bush

Kista med George H.W. Bush har stått i kongressbygningen og blir frakta derfrå til Washington National Cathedral, der Bush senior blir heidra med ei minnegudsteneste klokka 17 norsk tid.

Kista blir deretter flogen til Texas der Bush torsdag blir bisett frå universitetsbiblioteket som er kalla opp etter han og gravlagt på gravstaden til Bush-familien. Der er òg kona hans Barbara, som døydde i april, gravlagd, og dessutan dottera Robin som døydde tre år gammal.

Forutan Trump skal dei fire attlevande presidentane - Jimmy Carter, Bill Clinton, George W. Bush og Barack Obama, vere til stades under minnegudstenesta på onsdag.

Til stades er òg prins Charles frå Storbritannia, regjeringssjef Angela Merkel frå Tyskland, kong Abdullah og dronning Rania frå Jordan, og tidlegare president Lech Walesa frå Polen, blant mange fleire.

Bush senior døydde i heimen sin i Houston fredag, 94 år gammal.

I Kosovo erklærte styresmaktene onsdag nasjonal sørgjedag til minne om Bush. Sørgjedagen vart mellom anna markert med teikning av det amerikanske flagget på ein barneskule, og det vart flagga frå halv stong i landet.

Bush blir rekna som ein viktig tidleg alliert med dei etniske albanerne i den tidlegare serbiske provinsen.

(©NPK)

Kista med president George H.W. Bush har stått i kongressbygningen tysdag og onsdag. Foto: AP / NTB scanpix

Lærer Suzana Ibrahimi passar på at barna teiknar amerikanske flagg ved ein skule i Pristina onsdag. Foto: AP / NTB scanpix

Teikning av det amerikanske flagget stod på programmet på ein skule i Pristina onsdag. Foto: AP / NTB scanpix