Filippinane ber Kina respektere Haag-avgjerd

Utanriksministeren på Filippinane, Perfecto Yasay, skal fredag vere med på det to dagar lange Asia-Europa-møtet (Asem) i hovudstaden i Mongolia. Der skal òg den kinesiske statsministeren, Li Keqiang, vere til stades.

– Yasay skal diskutere Filippinanes fredelege og rettslege tilnærming til Sørkinahavet og behovet for at partane respekterer rettsavgjerda, heiter det i ei fråsegn frå det filippinske utanriksdepartementet.

Fråsegna torsdag er den sterkaste frå Filippinane til no etter at valdgiftsdomstolen i Haag tysdag slo fast at det kinesiske kravet på det ressursrike og strategisk viktige Sørkinahavet ikkje har rettsleg grunnlag.

Styresmaktene i Kina har uttalt at dei ikkje kjem til å respektere rettsavgjerda. Onsdag trua Kina med å opprette ei luftforsvarssone over Sørkinahavet. (©NPK)