Fiskeribladet: Harald Tom Nesvik (Frp) tar over som fiskeriminister
Framstegsparti-veteranen Harald Tom Nesvik tar over etter Per Sandberg som fiskeriminister, ifølgje Fiskeribladet.
Fiskeribladet skriv at tidlegare parlamentarisk leiar Harald Tom Nesvik i Framstegspartiet blir ny fiskeriminister i Solberg-regjeringa. Han var måndag formiddag på veg til Oslo, skriv Fiskeribladet.
Kjelder VG har snakka med, seier Nesvik kjem til å bli utnemnt til fiskeriminister i eit ekstraordinært statsråd måndag.
Han skal også ha vore aktuell som statsråd tidlegare, men omsynet til representasjon frå forskjellige distrikt gjorde det vanskeleg for han å ta posten, ifølgje NRK. Politisk kommentator Magnus Takvam kallar Nesvik «det heitaste tipset»
- Det har eg ingen kommentar til, seier Harald Tom Nesvik til VG.
Han jobbar hos brønnbåtselskapet Sølvtrans. Han skulle eigentleg vore fylkesmann i Møre og Romsdal, men takka nei til jobben for å fortsette hos Sølvtrans, ifølgje Fiskeribladet.
Ei rad medium, inkludert NTB, får bekrefta av kjelder at Per Sandberg har bestemt seg for å trekkje seg som fiskeriminister i kjølvatnet av kritikken som er retta mot han etter feriereisa med kjærasten Bahareh Letnes til Iran.
Tidlegare parlamentarisk leiar i Framstegspartiet Harald Tom Nesvik blir truleg ny fiskeriminister. Foto: Håkon Mosvold Larsen / NTB scanpix