Flaum har kosta minst fire liv i Tyskland

Brannmannen vart tatt av vassmassane då han prøvde å redde ein annan person i Schwäbisch Gmünd, rundt 65 kilometer aust for Stuttgart i delstaten Baden-Württemberg.

Ordførar Joachim Bläse seier til lokalavisa Gmünder Tagespost at det kort tid før klokka 22 søndag kveld var snakk om ei «syndflod» og deretter «eit mareritt». Avisa beskriv uvêret som det verste på fleire tiår i området.

Ein annan stad i delstaten, i byen Weissbach, vart ein 60 år gammal mann funnen omkommen i eit underjordisk parkeringsanlegg.

Ei 13 år gammal jente, som hadde søkt ly frå det kraftige regnvêret under ei jernbanebru Schorndorf, vart treft av eit tog og omkom på staden, opplyser politiet. Ein tolv år gammal gut som var saman med henne, slapp uskadd frå hendinga.

Uvêr har herja i Sør-Tyskland natt til måndag og nokre stadar har fått like mykje regn på ein time som dei normalt får på to veker. I distriktet Landshut kom det 67 millimeter nedbør på ein time, opplyste tyske meteorologar måndag morgon.

I Laupheim i Baden-Württemberg er det meldt 100-årsflaum og i Neckarsulm stod måndag deler av ein Audi-fabrikk under vatn, noko som førte til full stopp i bilproduksjonen. (©NPK)