Fleire enn før trekkjer asylsøknaden

Utlendingsdirektoratet behandla 9.151 asylsøknadar i perioden januar til mai. Av desse vart 1.700 søknader trekte, noko som utgjer 18,5 prosent, melder P4.

– Vi har ikkje opplevd så stort omfang tidlegare, seier administrasjonssjef Vesna Curk i asylavdelinga i Utlendingsdirektoratet.

I tillegg søkte 1.415 personar om hjelp til retur til heimlandet.

Delen som trekte søknaden frå januar til mai, er høgare enn for heile 2015 og heile 2014. I fjor valde 804 av 11.884 asylsøkjarar å droppe søknaden, mens det for to år sidan var 442 av 10.056 asylsøkjarar. Dermed var det høvesvis 6,7 og 4,4 prosent som trekte søknaden i desse to åra.

Blant dei som har trekt asylsøknaden i år, er 474 irakarar, 297 syrarar og 270 afghanarar.

– Det er ein del syriske søkjarar som ikkje ønskte å vente på behandling av søknaden. Ein del hadde også forventningar om at dei ville få ein stad å bu og arbeid, noko som ikkje var tilfelle. Det var kanskje spesielt det siste som var utslagsgjevande, seier Curk. (©NPK)