Fleire meldingar om at komikaren Dave Chappelle vart angripen på scena

Chappelle heldt eit show i den ikoniske arenaen Hollywood Bowl i Los Angeles då ein mann sprang opp på scena og gjekk til angrep, skriv mellom anna Twitter-brukaren DoZay.

Ein video som er delt på Twitter viser at Chappelle blir kroppstakla av mannen. Videoen viser ikkje kva som skjer etterpå, men det ser ikkje ut til at komikaren vart alvorleg skadd.

Journalisten Sharon Carpenter, som er knytt til BBC og Good Morning America, skriv at Chappelle var i ferd med å avslutte showet sitt då han vart angripen. Ho skriv at komikaren verka ok og at han vitsa om hendinga.

Fleire kjendiskomikarar deltok i showet, som vart filma av Netflix.

(©NPK)