FN: – Etnisk reinsing i Sør-Sudan

(NPK-NTB-AFP): Det er fare for eit omfattande folkemord i Sør-Sudan, ifølgje ein FN-kommisjon som har besøkt landet. Etnisk reinsing skal allereie vere i gang.

npk@npk.no

Publisert: 01.12.2016 kl 17:39

– En prosess med etnisk reinsing er allereie i gang i fleire område i Sør-Sudan. Dette omfattar utsvelting, massevaldtekt og nedbrenning av landsbyar, seier Yasmin Sooka, som leier kommisjonen.

Gjennom det ti dagar lange opphaldet i Sør-Sudan møtte ho mange landsbybuarar som sa dei var villige til å bruke vald for å få landsområde tilbake.

– Forholda legg til rette for ei gjentaking av det som skjedde i Rwanda. Verdssamfunnet er forplikta til å forhindre det, seier Sooka.

Om lag 800.000 menneske vart drepne i folkemordet i Rwanda i 1994.

Sør-Sudans president Salva Kiir avviser FN-kommisjonens vurdering på det sterkaste.

– Noko slikt finst ikkje i Sør-Sudan. Det er ikkje noko etnisk reinsing, seier han til nyheitsbyrået Reuters.

Væpna konflikt mellom Kiir og tilhengjarar av den tidlegare visepresidenten hans Riek Machar braut ut i Sør-Sudan i 2013. Gjerningsmennene bak valds- og krigshandlingane angrip ofte medlemmer av andre etniske grupper.