FN: – Fleire er avhengige av narkotika

Dette var første gong på seks år at det vart registrert ein auke i talet på personar med eit narkoproblem, som no ligg på 29 millionar. Inntil i fjor vart det anslått at 27 millionar menneske var avhengige av ulovlege rusmiddel.

Forklaringa på auken er at heroin igjen er blitt meir populært i fleire vestlege land, ifølgje rapporten frå FNs program for narkotika og kriminalitet (UNODC).

– Heroin er framleis rusmiddelet som tar flest liv, og denne veksten i bruken må takast tak i raskt, seier UNODC-leiar Yury Fedotov.

Heroinbruken vart tydelegvis ikkje stagga av at produksjonen av opium, som blir brukt til å lage heroin, fall med nesten 40 prosent i fjor.

Nedgangen kjem av små opiums-avlingar i Afghanistan. Etter 15 år med betydelege vestlege militære styrkar i Afghanistan produserer landet framleis 95 prosent av opiumen i verda. (©NPK)