Forsvararen: 13-åringen ville ikkje leggjast inn

Forsvararen til mora, advokat Aasmund Olav Sandland, var tydeleg på at det ikkje er noko grunnlag for å fengsle klienten etter at dottera døydde. Han skildrar saka mot mora med at det ikkje er nokon bevis mot henne og at det heller ikkje er gjort noko straffbart. Vidare seier han at dødsfallet til 13-åringen har klare likskapar med andre dødsfall blant anorektikarar.

– Det var ingen ytre omstende som skulle tilseie at dødsfall skulle skje. Jenta var skjerpa og klar og gledde seg til blant anna å spele Geni på nyttårsaftan, sa advokat Aasmund Olav Sandland etter fengslingsmøtet i Gjøvik tingrett onsdag.

Retten avgjorde onsdag ettermiddag at mora ikkje skulle fengslast.

Den 13 år gamle jenta hadde eit fem veker langt opphald på ein ungdomspsykiatrisk klinikk i slutten av 2014 og fram til februar i fjor. Ho skal overfor mora ha gjort det klart at ho ikkje ville ha fleire slike opphald.

– Ho blei livredd for den typen bistand. Ho ville skade seg dersom det blei eit tema med ny innlegging, seier advokaten. (©NPK)