Framleis leiteaksjonar i Hordaland

– Leiteaksjonen vil gå føre seg med full styrke utover dagen. Så får vi ta stilling til kor lenge den skal haldast gåande, seier operasjonsleiar Frode Kolltveit i Vest politidistrikt til NTB.

I Ulvik blir det leita etter ein sakna 30 år gammal polsk mann, som har vore sakna sidan søndag. Han blei sist sett nær Solsævatnet.

Heimevernet og Sivilforsvaret hjelper politiet i søket.

I Brekkhus, 13 kilometer nord for Evanger i Voss kommune, er ein mann i 40-åra frå Litauen sakna. Han blei sist sett tysdag.

Sandalar er blitt funne i terrenget i Brekkhusli, og politiet ser ikkje vekk frå at dei kan høyre til den sakna 40-åringen.

Politiet i Hordaland bad torsdag folk i området Evanger-Eksingedalen om å sjekke hagar, uthus, garasjar og liknande. Mannen er kanskje iført ei grå T-skjorte og grå joggebukse. (©NPK)