Framleis raude tal for Viaplay
Det kriseramma strøymeselskapet Viaplay gjekk med eit driftsunderskot på 473 millionar svenske kroner i første kvartal.
Til samanlikning var underskotet i same kvartal i fjor på 325 millionar svenske kroner.
Derimot steig omsetninga frå 4,5 milliardar til 4,7 milliardar svenske kroner.
– Vi har no fullt fokus på å implementere dei mange operasjonelle forbetringane som trengst på tvers av konsernet. Resultata for første kvartal er i tråd med forventningane våre, og vi har gjenteke prognosen vår heile året, skriv administrerande direktør Jørgen Madsen Lindemann i kvartalsrapporten.
Driftsunderskotet på 473 millionar svenske kroner svarer litt over til 480 millionar norske kroner.
I rapporten går Lindemann ut mot Viaplay-abonnentar som deler kontoen sin med andre, skriv Kampanje. Viaplay reknar med at ein tredel av premium-abonnentane deira deler kontodetaljane sine med fleire.
– Dette er eit stort problem for bransjen, seier han.
(©NPK)
Viaplay fortset å gå med underskot, ifølgje første kvartalsrapport for selskapet i 2024. Foto: Frederik Ringnes / NTB