Annonse

Frankrike etterforskar mogleg terrorangrep

(NPK-NTB-AFP): Ein mann vart skoten og drepen av politiet etter at han knivdrap ein politimann og tok sambuaren og sonen til mannen som gislar. Mannen hevda at han har tilknyting til ekstremistgruppa IS, og saka blir etterforska som terror.

Franske elitestyrkar rykte måndag kveld ut til eit villastrøk der ein politimann vart knivdrepen naboen, som deretter forskansa seg i huset til politimannen med familien hans som gislar. Vitne seier mannen ropte «Allahu Akbar» (Gud er stor) mens han fleire gonger knivstakk politimannen.

Då forhandlingar med drapsmannen ikkje førte fram, rykte politiet inn i bustaden. Angriparen vart skoten og drepen av politiet. Inne i huset fann dei liket til ei kvinne, og ein uskadd gut. Barnet er i sjokktilstand, ifølgje påtalemakta. Kvinna skal også ha vore politi.

Kjelder med innsyn i etterforskinga seier mannen hevda at han hadde tilknyting til ekstremistgruppa IS mens han var i forhandling med politiet.

– Antiterroravdelinga i den franske påtalemakta vil ta omsyn til metode, mål og uttalane drapsmannen gjorde under forhandlingane med politiet, opplyser ei kjelde.

Eit nyheitsbyrå knytt til ekstremistgruppa bekreftar at mannen var ein IS-krigar.

Den franske påtalemakta skal etterforske saka for å finne ut om den er terrorrelatert. (©NPK)