Gass-ramma kviknar til etter ulykka i Trondheim

(NPK-NTB): St. Olavs hospital reknar med at dei alt torsdag kan skrive ut dei fleste pasientane etter gassulykka på eit pukkverk i Trondheim onsdag. Blant dei skadde var to barn.

npk@npk.no

Publisert: 12.05.2016 kl 17:22

I alt 18 personar vart sende til St. Olavs hospital etter ulykka onsdag. Torsdag morgon opplyste sjukehuset at to barn på åtte år og åtte vaksne er innlagt til observasjon og får surstoffbehandling. Alle har vorte betre, og sjukehuset reknar med at dei kan skrive ut dei fleste torsdag.

Seks av dei skadde har tilknyting til NRK. I tillegg vart tolv personar, blant dei to brannkonstablar, to politibetjentar og seks frå helsevesenet, sende til sjukehus, ifølgje Trøndelag politidistrikt. To av dei skadde arbeidde ved pukkverket.

NRK-teamet var på staden for å gjere opptak til barneprogrammet «Litt av en jobb», der barn får prøve seg i ulike yrke.

Ulykka skjedde i samband med ei rutinemessig sprenging ved pukkverket, opplyser dagleg leiar Henrik Bager i Franzefoss til NTB. Etter sprenginga kom det gass ned i ei sjakt og ein tilhøyrande tunnel, ifølgje Bager.

Drifta ved anlegget går no som normalt, og Bager seier at dei ikkje forstår korleis ulykka kunne skje.

– Dette har aldri skjedd før i den nærare 100 år lange historia til selskapet. Selskapet går no gjennom alle tryggingsrutinar ned til minste detalj for å hindre at dette skjer igjen, seier han og legg til at Franzefoss er svært glad for at det har gått bra med alle som vart eksponerte for gassen.

– Vi etterforskar saka for å finne ut om det har skjedd noko straffbart, men så langt er det ikkje noko som tyder på det. Vi kan enno ikkje svare på kva som skjedde. Vi håper å finne ut av dette, seier Marit Johanne By, etterforskningsleiar ved Heimdal politistasjon, til Adresseavisen.