Gjerningsmannen i Trollhättan er død

(NPK-NTB-TT): Gjerningsmannen som angreip barn og vaksne på Kronan skole i Trollhättan, er død, opplyser politiet. Dermed er tre personar, blant dei ein ung gut, døde etter angrepet.

npk@npk.no

Publisert: 22.10.2015 kl 16:10

Sist oppdatert: 22.10.2015 kl 16:56

– Ein ungdom, ein elevassistent og gjerningsmannen er død, sa etterforskningsleiar Tord Haraldsson på pressekonferansen til politiet torsdag ettermiddag.

Ytterlegare to personar, ein vaksen og ein elev, blei såra og ligg på sjukehus.

– Dei som framleis ligg på sjukehus, er svært alvorleg såra, sa Haraldsson.

Politiet har ikkje gått offentleg ut med opplysingar om identiteten til den 21 år gamle gjerningsmannen. Haraldsson opplyser at politiet ikkje kjende til han frå tidlegare.

Inne i skulebygningen gjekk gjerningsmannen til to forskjellige klasserom og banka på. Den eine eleven som opna døra til det eine klasserommet, er guten som blei angripen og seinare døydde av skadane.

Politiet vil undersøkje om gjerningsmannen har lagt ut informasjon om angrepet på internett. Ifølgje Haraldsson var 21-åringen truleg ikkje i stand til å bli avhøyrt før han døde.

I leilegheita til gjerningsmannen har det blitt funnet ting som er «interessante», men politiet vil ikkje gå inn på kva slags ting det dreier seg om. (©NPK)