Global varmerekord i mai

(NPK-NTB-AFP): Førre månad var den varmaste mai i moderne historie, og den går inn i rekkja av 13 strake månadar med temperaturrekord, ifølgje amerikanske meteorologar.

npk@npk.no

Publisert: 17.06.2016 kl 07:32

Perioden er den lengste med månadlege temperaturrekordar sidan dei globale målingane starta for 137 år sidan.

Sjølv om vêrfenomenet El Niño er i ferd med å minke, har det framleis stor påverknad på temperaturane.

– El Niño er berre éin av mange faktorar. Unormal er den nye normalen, seier direktøren for Verdklimaforskingsprogrammet, David Carlson.

Den globale gjennomsnittstemperaturen for mai på 1900-talet var 14,8 grader celsius. Mai i år låg 0,87 grader over det gjennomsnittet. I same månad i fjor, som også var ein rekordmånad, låg snittemperaturen 0,2 grader lågare enn i år.

Ekspertar seier at den globale oppvarminga er skuld i fleire miljøkatastrofar verda over, frå bleiking av Australias Great Barrier Reef til skogbrannar i Canada. Fleire stader har det vore ekstremvêr i mai, blant anna i form av enorme mengder regn i Europa og sør i USA. (©NPK)