Gravlunden på Lesvos er full

Ifølgje ein lokal biskop vil det ta to-tre år å få tak i eit jordområde der det kan etablerast ein ny gravlund. Men ordføraren på øya, Spyros Galinos, håpar på raskare hjelp og tok saka opp med statsminister Alexis Tsipras då han onsdag besøkte øya.

Nesten 500 personar har så langt i år mista livet i Egearhavet medan dei har vore undervegs frå Tyrkia til Hellas. Mange av dei har drukna på den korte, men farlege strekningen som skil Lesvos frå Tyrkia. Minst 80 drukna i førre månad, mange av dei barn.

Så seint som onsdag vart ytterlegare fem menneske plukka døde opp frå havet, deriblant ei kvinne og to barn, ifølgje den greske kystvakta.

På likhuset på Lesvos fortviler dei tilsette.

– I dag tidleg tok vi imot ytterlegare fem døde. Denne tragedien må ta slutt, seier Thodoris Noussios, som arbeider ved likhuset.

For tida ligg 50 døde i likhuset og i ein kjølekonteinar utanfor sjukehuset. Han har private givarar betalt for.

80 uidentifiserte flyktningar og migrantar er gravlagde på kyrkjegarden på øya.

Styresmaktene på Lesvos erklærte tysdag denne veka ein tredagars sørgjeperiode til minne om alle som har drukna når dei har prøvd å ta seg til øya. (©NPK)