Greta Thunberg må møte i retten
Klimaaktivisten Greta Thunberg er tiltalt for sivil ulydnad etter å ha nekta å følgje ordre frå politiet om å fjerne seg ved to demonstrasjonar i Stockholm.
Demonstrasjonane fann stad utanfor Riksdagen i mars i år.
Saka kjem opp for retten 8. mai, opplyser ein rettsfunksjonær til nyheitsbyrået AFP.
Saman med fleire andre aktivistar blokkerte den svenske 21-åringen hovudinngangen til Riksdagen. Ho vart boren vekk av politiet ved to høve.
Ifølgje rettsdokumenta nektar Thunberg straffskuld etter tiltalen.
I august 2018 sette den då 15 år gamle Greta Thunberg seg ned utanfor Riksdagen i staden for å gå på skulen. Ho har etter det vorte eit globalt ikon for kampen mot klimaendringar.
Thunberg har to gonger tidlegare fått bøter av svenske domstolar for sivil ulydnad. Også i andre land, blant dei Noreg, har politiet fjerna henne frå aksjonsstader.
(©NPK)
Greta Thunberg var blant klimaaktivistane som førre månad vart fjerna frå hovudinngangen til Riksdagen i Stockholm. I mai må ho møte i retten. Foto: Fredrik Sandberg / TT / NTB