Haaland-drakta avgjorde for Noreg

På stillinga 1–1 i det 74. minuttet vart Ohi bytt inn til sin første landskamp på 1.983 dagar.

– Eg fekk beskjed om å gå inn og gjere jobben. Det vart snakka mykje om den defensive organiseringa, men jobben min er jo å skåre, då. Sjølvsagt var det herleg å komme inn og gjere det, sa Ohi til NTB.

I juni 2017 debuterte han på landslaget då Lars Lagerbäck bytte han inn for Alexander Søderlund ved pause i 1-1-kampen mot Sverige. Det var hans einaste landskamp inntil Ståle Solbakken bytte han inn for Jørgen Strand Larsen i det 74. minuttet torsdag.

– Eg vart teken ut av Ståle i fjor til kampane mot Tyrkia og Montenegro, men eg fekk ikkje spele. Sjølvsagt er det tøff konkurranse, men eg har håpa og drøymt meg bort om å få sjansen. Så fekk eg ein telefon til slutt, og det var utruleg herleg. Så fekk eg spele òg, og skåra. Det er gutedraumen, sa han.

– Det er veldig gøy med Ohi. Kult at han kom inn, tok drakta til Erling og skåra, sa lagkaptein Martin Ødegaard til NTB.

Perfekt

Ødegaard slo frisparket som førte til vinnarmålet. Hans dødballfot stod bak begge Noregs skåringar i Dublin, ettersom hjørnesparket hans i slutten av første omgang vart nikka inn av Leo Østigård.

Ohi kom inn for Jørgen Strand Larsen.

– Det var perfekt at Ohi kom inn og skåra. Herleg for han og herleg for oss, sa Celta-spissen.

Ohi har sidan han forlét Molde i fjor hatt suksess i serbiske Raude Stjerne og no i Brøndby, der han har fem mål på ni seriekampar.

– Eg lever for situasjonar som den i dag. Eg hadde ei god kjensle då ballen kom. Mitt første touch gjekk i motspelar, men så fekk eg den tilbake, og då sette eg den. Det var litt heldig men det var herleg at han spratt min veg. Og avslutninga var god. Med venstre, til og med. Det er ikkje så ofte, sa Ohi.

Gutedraum

Feiringa fortalde alt om kor mykje det betydde for han.

– Ein drøymer jo om å spele på landslaget, og så skårar ein i tillegg. Det er ein gutedraum, ein skikkeleg bonus som eg tek med meg vidare, sa han.

Han har aldri gitt opp draumen om meir spel på landslaget, særleg ikkje etter at han fekk vere med under samlinga i oktober i fjor.

– Det var eit bevis på at dei følgde med. Eg er innforstått med at konkurransen er knalltøff. Noreg har ei heilt sinnssjuk spissgruppe no, og det er ikkje berre-berre å komme seg inn der. For oss som er femte-, sjette- eller sjuandeval så må ein berre vere klar. Sjansen kan komme når som helst, og han kom for meg no. Då er det berre å gripe han. Det var herleg å gjere det.

(©NPK)

Ohi Omoijuanfo jublar saman med dagens første målscorar Leo Østigård etter å ha scora vinnarmålet i Noregs 2-1-siger over Irland i Dublin. Foto: Fredrik Varfjell / NTB

Det var sterke følelsar i sving etter at Ohi Omoijuanfo scora Noregs vinnarmål mot Irland, 1.983 dagar etter hans førre landskamp. Foto: Fredrik Varfjell / NTB

Ohi Omoijuanfo scorar Noregs vinnarmål mot Irland i Dublin medan debutanten Ola Brynhildsen ser på. Foto: Fredrik Varfjell / NTB