Hackar skal ha leke bilete og video frå «GTA 6»

Fleire bilete og videoklipp som skal vere frå det neste spelet i den svært suksessfulle «Grand Theft Auto»-serien, er offentleggjorde av ein person som hevdar å ha hacka speleprodusenten Rockstar Games.

vaktsjef@ntb.no/mari.hauge@npk.no

Publisert: 19.09.2022 kl 07:36

Det er 90 filmklipp i materialet som er offentleggjort. Filmklippa er lagt ut på eit nettforum av ein person som hevdar å også ha hacka drosjeselskapet Uber for nokre dagar sidan. Hackaren hevdar å ha fått tilgang til den nødvendige informasjonen gjennom ein Slack-kontoen til ein tilsett.

I klippa som offentleggjorde, kan ein mellom anna sjå ein kvinneleg hovudkarakter rane ein kafé. Det har tidlegare vorte meldt at neste spel i «Grand Theft Auto» (GTA)-universet for første gong vil ha ein kvinneleg hovudkarakter.

Videoane er etter seiande tekne av ein eldre og uferdig betaversjon av spelet. Saman med videoane har hackaren lagt ved ein beskjed til Rockstar. Vedkommande oppmodar Rockstar til å «forhandle om ein avtale», og han ber morselskapet Take-Two Interactive (TTIS) om å ta kontakt.

Den anerkjende spelejournalisten Jason Schreier i Bloomberg skriv at han har fått stadfesta av fleire kjelder hos utviklaren Rockstar at klippa er ekte.

Schreier kallar det «ein av dei største lekkasjane i TV-spel-historia» og eit «mareritt» for Rockstar. Han seier det er fleire grunnar til at lekkasjen svir.

– Éin er at han vil forstyrre arbeidet i ei stund. Ein annan er at han kan presse leiinga til å avgrense moglegheitene til å jobbe heimanfrå. Etterverknadene av denne lekkasjen blir kanskje ikkje klare på ei stund, tvitrar han.

«GTA 6» er eit av dei mest etterlengta spela i verda. Forløparen «GTA 5» vart sleppt heilt tilbake i 2013 og er omtalt som det mest inntektsbringande underhaldningsproduktet nokon gong. Marketwatch skreiv i 2018 at spelet hadde tent inn 6 milliardar dollar.

Mykje av årsaka er at den nettbaserte fleirspelarmodusen til spelet framleis er svært populært.